1371. September 26. Oppeln

Universis et singulis tam presentibus quam futuris Nos Petrus Advocatus hereditarius ac Hanco Coufman, . . Lexito, Mathias faber, Petrus Dunknecht, Petrus Brenis, Petrus Niger et Franczko lanifex, Scabini Opolienses, ad sonum Campane in bannito Iudicio congregati, notum facimus per presentes Quod cum inter honorabilem virum dominum Iohannem Prepositum Domusdei parte ex una et Ticzconem dictum Wasserfurer concivem nostrum occasione unius Maccelli Carnium ex alia parte in Iudicio spirituali exorta fuisset materia questionis, Tandem prefatus Ticzco coram nobis constitutus per discretorum virorum amicabilem conposicionem et plenam concordiam renunciavit omni liti et questioni que sibi per predictum dominum Prepositum obiciebatur, recognoscens publice predictum Maccellum deinceps ad collacionem et quamvis aliam disposicionem spectare domini Prepositi et suorum successorum Monasterii Domusdei prenominati, pro eo et ex eo Quod idem dominus Prepositus dictum Maccellum dicto Ticzconi et Katherine uxori sue karissime ad tempora vite ipsorum amborum benivole contulit tenendum et spontanee possidendum, de quo quidem Maccello prefati Ticzco et Katherina uxor sua sue vite temporibus annis singulis in festo beati Martini Septem lapides sepi pro Censu annuali eidem domino Preposito et successoribus suis qui pro tempore fuerint, dare et tamquam vero domino et patrono solvere tenebuntur. In cuius rei testimonium Sigillurn nostrum bannitum presentibus est appensum. Datum Opol feria sexta proxima ante diem beati Michaelis Archangeli, Anno Domini m° ccc lxx primo.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 1, Urkunden des Klosters Czarnowanz. Hrsg von dr W. Wattenbach, Breslau 1857.